كتب حماده جمعه
بتشتري ازازة الزيت بكام؟ أكيد تشتريها بسعر مرتفع وهذا لأن أسعار الزيت هذه الفترةغاليه جدا والناس أصبحت تحوال البحث على منتجات بسعر أفضل وجودة عالية خاصة وخاصة أن الزيت بيعتبر سلعة استراتيجية مفيش بيت في مصر يقدر يستغنى عنها.
ولو انت قلقان من دخول شهر رمضان الكريم وقاعد تحسبها وبتقول يا ترى إزازة الزيت هتوصل كام؟ ،احنا بنقولك متقلقش وده لأننا هنقولك في حلقتنا النهاردة تشتري أرخص ازازة زيت موجودة في السوق منين، تابعونا:
لو مدايق من ارتفاع أسعار الزيت بشكل كبير الفترة اللي فاتت سواء بقى كانت الزيادة دي بسبب ارتفاع أسعار الدولار أو جشع التجار فخلاص دلوقتي تقدر تطمن وده لأن وزارة التموين طرحت صنف جديد من زيت الطعام في الأسواق وبسعر هينافس كل الانواع المتاحة ف السوق في كل السلاسل التجارية.
والوزارة طرحت الزيت ده عشان تحارب الغلاء وكمان تتصدى لكل محاولات جشع التجار، ودلوقتي هتقدروا تشترو الزيت ده من كل فروع المجمعات الاستهلاكية التابعة لوزارة التموين، و هتلاقوا الازازة مكتوب عليها سوزيت واللي وزنها 800 مللي و بدأت وزارة التموين توفرها للمواطنين بسعر 35 جنيه.
طيب هل ده معناه إن الزيت الجديد هيكون للي معاهم بطايق تموينيه بس؟
لا ياسيدي الزيت الجديد اللي طرحته وزارة التموين هيكون لكل المواطنين وخاصة اللي مش معاهم بطايق تموين يقدروا يشتروه دلوقتي من كل فروع المجمعات الاستهلاكية.
وده لأنه هيكون متاح لكل فرد صرف 2 ازازة زيت وده بتعليمات من الوزارة عشان كل الناس تقدر تشتريه ويكون متوفر ليهم.
مش بس كده ده كمان زيت سوزيت الجديد مش هيكون متاح في المجمعات الاستهلاكية بس ده انتوا كمان تقدروا تشتروه من معارض «أهلا رمضان» المنتشرة على مستوى المحافظات واللي هتستمر لحد نهاية شهر رمضان الكريم.
الجميل بقى إن الزيت ده إنتاج محلي ومش مستورد، ومعبى من شركة النيل للزيوت والمنظفات التابعة للشركة القابضة للصناعات الغذائية واللي تعتبر واحدة من شركات وزارة التموين
طيب هو إيه الفرق بين الزيت الجديد والزيت اللي بيتم طرحه في التموين؟
هقولك يا سيدي بالنسبة لزيت سينوزيت بيتم طرحه في أجنحة «أهلا رمضان» و في المجمعات الاستهلاكية، وفي المعارض الرئيسية بـ35 جنيه بس عشان يساعد الدولة في محاربة غلاء الأسعار وجشع بعض التجار خاصة في أسعار السلع الغذائية الأساسية ومنها الزيت والسكر والأرز
وبالنسبة لسعر الزيت في التموين اللي بيصرفه كل اللي معاهم بطاقات تموين، فالسعر بيكون 25 جنيه للإزازة الـ 800 مللي.
وحصة كل فرد في البطاقة بتكون إزازة واحدة بس وبحد أقصى 4 ازايز للبطاقة الواحدة. ده كمان مصر استوردت زيت روسي جديد أسمه التيرو، والزيت قلب الدنيا وده لأنه في مميزات كتيرة منها نقاءه الشديد وسعره المغري.
وطبعا المصريين فرحوا بالزيت ده لأن سعره كان 58 جنيه بس والعبوة كانت 810 ملي وده على فكرة سعر مناسب جدا بالمقارنة مع شركات زيوت تانيه في مصر بتنتج نفس المنتج بجودة أقل وبسعر أعلى.
ولو انت مش عارف فـ الحكومة حطت خطة عشان تواجه عجز الزيت في مصر،والخطة دي من ضمنها إن الدولة بـ تسعى للتوسع في زراعة المحاصيل الزيتية؛ عشان تحقق الاكتفاء الذاتي من إنتاج زيت الطعام وتقلل من استيراده.
زي مثلا زراعة محصول فول الصويا و التوسع في إنتاجية محصول القطن و محصول عباد الشمس، والدرة. ده غير كمان إن الدولة بتسعى دلوقتي إنها تبني صوامع لتخزين البذور وده عشان تساعد المصانع إنها تخزن زيوت الطعام اللي بتنتجها.
دلوقتي قولنا رأيك في أسعار الزيت في مصر وهل شايف إن الحكومة قدرت توفر السلع الأساسية زي الزيت بسعر مناسب؟
