في الغربة الايام شبه بعضها

في الغربة الايام شبه بعضها
بقلم /مرفت عبد القادر
كل واحد في السكن تلاقيه واخد جنب
اللي بيكلم خطيبته، واللي بيكلم مراته وعماله تشكي من هم العيال وقساوة الايام في غيابه
واللي بيكلم امه ويقولها ادعيلي يا أمي ده ضهري كان حديد وانحنى، وترد عليه وتقوله :
انا خلفت راجل ما يبكيش لو ضاق عليه الحال الا على سجادة الصلاة
الغربة زي الصبار، طعهما مُر وعايزاك تستحمل جفا الايام والليالي، ماهو مفيش حلاوة من غير نار، بتديك هي قروش، وبتاخدهم من عمرك وشبابك، عمري في التلاتين وشكلي يدي الخمسين
كل اللي بيربطني بيني وبين عيالي حوالة، اتحولت لكفيل ليهم وميعرفوش غير ورقة بتوصل اول كل شهر
عرفت يعني ايه غربة ولا ابعتلك شعره من الشعر اللي شاب، يمكن اصعب عليكم وتدعولي بدل ما انتم بتحسدوني

مقالات ذات صله